CIC Logo

Horrid Henry Dónall Dána An Seit ar Fad

By Cló Iar-Chonnacht, Máirín Ní Ghadhra, Gormfhlaith Ní Thuairisg, Marion Ní Shúilleabháin

An seit ar fad de na leabhair Horrid Henry : Dónall Dána ar fáil ar phraghas laghdaithe - €27 - nuair a cheannaítear iad mar bheart ar an leathanach seo. Gnáthphraghas €40. Tá an praghas seo bailí go dtí 12 Nollaig, 2016 fad is atá an stoc ann. 

Is iad na leabhair atá sa tsraith ná: Horrid Henry : Dónall Dána, Síog na bhFiacla, An Club Rúnda, Míola, Saibhreas Scioptha

Seans gur chuala tú faoin mbuachaill dána sin Horrid Henry. Anois tá sé in am aithne a chur ar Dhónall Dána, mar atá baistithe ar Horrid Henry sa leagan Gaeilge den tsraith cháiliúil le Francesca Simon atá á chur i gcló ag Cló Iar-Chonnacht agus iad maisithe ag Tony Ross.

 

Foilseoidh Cló Iar-Chonnacht cúig leabhar ón tsraith Horrid Henry i mbliana agus cúig cinn eile an bhliain seo chugainn.  Tá an tsraith aistrithe go Gaeilge bhreá nádúrtha ag ceathrar ban, Máirín Ní Ghadhra, Gormfhlaith Ní Thuairisg, Caitlín Ní Chualáin agus Marion Ní Shúilleabháin. Is cainteoirí Gaeilge ó dhúchas iad uile agus iriseoirí le RTÉ Raidió na Gaeltachta. 

 

Is é Horrid Henry: Dónall Dána an chéad leabhar sa tsraith agus tá cheithre gearrscéal san áireamh ann mar atá i ngach leabhar eile sa tsraith.

 

Diabhailín ceart é Dónall Dána. Is buachaill é gur aoibheann leis cleasanna gránna, uafásacha a imirt.  Caitheann sé bia thart, sciobann sé rudaí, bíonn sé ag brú, ag soncadh agus ag pinseáil.

 

Tá deartháir níos óige ag Dónall atá iomlán difrúil ó Dhónall. Buachaill maith é a dheartháir a chabhraíonn le chuile dhuine, a itheann a chuid glasraí agus nach bpiocann a shrón riamh! 

 

Meas tú céard a tharlódh dá mbeadh Dónall foirfe ar nós a dhearthár?  

Praghas: €40.00

Léirmheas

Dónall Dána, Gobblefunked, Léirmheas le Aonghus Ó hAlmhain.

* Foilsíodh an léirmheas seo den chéaduair ar Gobblefunked.com ag an nasc seo: http://www.gobblefunked.com/donall-dana/

Gabhaimis buíochas leis an léirmheastóir Aonghus Ó hAlmhain agus leis an suíomh Gobblefunked.

Tá cáil ar an gcarachtar Horrid Henry a chruthaigh Francesca Simon. Buachaill beag a chothaíonn mioscais is achrann pé áit a théann sé. Ainspioraid ainriail.

Tá meitheal bhreá aistritheoirí tugtha le chéile ag Cló Iar Chonnacht, agus tá Gaeilge bhreá créúil curtha ar eachtraí is achrann Dónall Dána curtha ar fáil. Beidh léitheoirí idir óg is sean lag ag gáirí faoi na bobanna a bhuaileann sé.

A dheartháirín Learaí gan-locht is mó a bhíonn thíos lena mhioscais. Ach is minic bob buailte ar féin ag a chéile comhraic Peigí Pusach. Tá friotal iontach ar fáil sa leabhar – srón a phiocfá faochain leis ag Róisín Raicleach an múinteoir rince. Agus nach mbeadh sceon ort roimh Bláthnaid Snáthaid, an t-altra allta? Ní bheadh barúil na ngrást agat cén casadh a bheadh sna heachtraí spleodracha greannmhara seo.

Agus gan amhras na focail is léaráidí Tony Ross ag freagairt go hiontach dá chéile.

Fainic gan craos a dhéanamh sa léamh nó beidh ort fios a chuir ar an Dochtúir Drochúlla de bharr tú bheith lag ag gáire!

Tréaslaím a saothar Máirín Ní Ghadhra, Gormfhlaith Ní Thuairisg, Caitlín Ní Chualáin agus Marion Ní Shúilleabháin.

Agus le Cló Iar Chonnacht a bhailigh meitheal chomh cumasach. Shamhlóinn gur mó racht gáire a chraith iad agus na hainmneacha á roghnú agus an chaint á mhúnlú.

Nunga! Nunga Nú! Nunga Nú! Nunga! Nunga Nú! Pól Ó Muirí, The Irish Times, Nollaig 5 2016

Chuala muid uilig iomrá ar Dhónall na Gealaí ach Dónall Dána? Seans go bhfuil aithne agat air i mBéarla mar Horrid Henry ach tá Horrid Henry i ndiaidh freastal ar chúrsa le Coláiste na bhFiann agus d’fhoghlaim sé Gaeilge!

Ach ná bíodh eagla ort – bíodh is go bhfuil scoth na Gaeilge aige – tá Dónall fós ina ghasúr beag iomlatach.

Francesca Simon a scríobh na leabhair Bhéarla ach mná na hÉireann – bhuel, mná nuachta RTÉ Raidió na Gaeltachta – a thug glór i nGaeilge dó: Gormfhlaith Ní Thuairisg; Máirín Ní Ghadhra; Caitlín Ní Chualáin agus Marion Ní Shúilleabháin.

Is iad a d’aistrigh Dónall Dalba chun na Gaeltachta gan stró. Tá Cóilín Caointeach, Bláthnaid Snáthaid, Peaidí Beadaí, Síle Searbh, Peigí Pusach agus Tomás Taghdach i gcuideachta Dhónaill. Thiar atá tú, i ngearrscéal osréalaíoch de chuid Uí Chadhain!

Cúig leabhar nua atá anois ar fáil – Míola, Sióg na bhFiacla, An Club Rúnda, Saibhreas Sciobtha! agus Dónall Dána.

Tá na léaráidí a rinne Tony Ross go fóill leis na leabhair agus dírithe ar léitheoirí idir seacht agus naoi mbliana d’aois atá na leabhair. Níor chóir don téacs dúshlán páiste nó duine fásta a thabhairt: “Éist go cúramach,” arsa Peigí, “mar níl mé chun é seo a rá ach aon uair amháin. Nuair atá ball den Chlub Rúnda ag iarraidh a theacht isteach, déarfaidh siad ‘NUNGA’. Aon duine atá istigh cheana féin déarfaidh siadsan ‘NUNGA NÚ’ ar ais.”

Nunga! Nunga nú!