CIC Logo

Anna Heussaff

Anna Heussaff

Ó thosaigh Anna Heussaff ar an scríobh cruthaitheach sa bhliain 2002, foilsíodh seacht n-úrscéal Gaeilge léi. Is úrscéalta bleachtaireachta do léitheoirí fásta iad Bás Tobann (Cois Life, 2004), Buille Marfach (Cló Iar-Chonnacht, 2010) agus Scáil an Phríosúin (Cló Iar-Chonnacht, 2015): tá na lárcharachtair chéanna iontu ach tá an chéad dá cheann suite ar chósta an iardheiscirt agus an tríú ceann i gceantar stairiúil Chill Mhaighneann sa phríomhchathair. Is sraith úrscéalta mistéire do léitheoirí óga in aois 10-14 bliana iad Vortex (Cois Life, 2006), Hóng (Cló Iar-Chonnacht, 2012) agus Sárú (Cló Iar-Chonnacht, 2017), ina bhfuil físchluichí fite fuaite in eachtraí an scéil, chomh maith le mórcheisteanna timpeallachta agus dúshláin eile i saol na n-óg. Is úrscéal grá d’fhoghlaimeoirí fásta é Cúpla Focal (Cois Life, 2007).

Bronnadh mórdhuais Chomórtais Liteartha an Oireachtais ar bheagnach gach úrscéal léi; agus sa bhliain 2013, thuill Hóng Gradam Speisialta na Moltóirí ag ócáid Leabhair Pháistí Éireann, duaiseanna CBI, nó na Bistos mar a thugtaí orthu tráth.

Sa bhliain 2014, foilsíodh an chéad úrscéal léi as Béarla, Deadly Intent (Severn House, Londain), faoina hainm cleite Anna Sweeney, ar leagan é dá húrscéal Buille Marfach. I 2010 agus i 2011, d’fhoilsigh Futa Fata, i gcomhar le Dorling Kindersley, trí leabhar fhíriciúla do dhaoine óga a d’aistrigh sí ó Bhéarla: Seo í mo Scoil, Leabhar Mór na hEalaíne agus Leabhar Mór an Cheoil. Foilsíodh Leabhar na Mallachtaí, a haistriúchán ar The Book of Curses le Conor Kostick (O’Brien, 2007) ar an suíomh Leighleat.com i 2015.

Tógadh Anna Heussaff le Gaeilge i mBaile Átha Cliath, áit a bhfuil cónaí uirthi inniu. Chaith sí trí bliana i Sasana ag obair le daoine gan dídean, agus ocht mbliana déag sna meáin chumarsáide in Éirinn, mar thaighdeoir agus mar léiritheoir/stiúrthóir le cláracha raidió agus teilifíse RTÉ. Bíonn babhtaí oibre ar siúl aici mar aon leis an scríbhneoireacht: ina measc, cúrsaí teagaisc do mhic léinn tríú leibhéal agus d’fhoghlaimeoirí fásta na Gaeilge, chomh maith le ceardlanna scoile faoi scáth na scéime WIS/Scríbhneoirí sna Scoileanna.

 

Táirgí Mór-éilimh Anna Heussaff