CIC Logo

Gearrscéalta Mháirtín Uí Chadhain faoi chaibidil ag seimineár idirnáisiúnta ar-líne

International seminar to examine the short stories of Máirtín Ó Cadhain Thursday, 10th September, 2020

Gearrscéalta Mháirtín Uí Chadhain faoi chaibidil ag seimineár idirnáisiúnta ar líne

Déanfar scrúdú úr agus athléamh ar Ghearrscéalta Mháirtín Uí Chadhain ag Seimineár Idirnáisiúnta Ar Líne a bheidh á óstáil i nGaeltacht na Gaillimhe Dé hAoine an 18 Meán Fómhair 2020 idir 1000-1600.

Glacfaidh seachtar saineolaithe as ceithre thír éagsúla páirt sa seimineár ar fhicsean gairid an scríbhneora Máirtín Ó Cadhain (1906-1970) arb as an gCnocán Glas, An Spidéal ó dhúchas é.

Beidh an seimineár á reáchtáil ag an gcomhlacht foilsitheoireachta Cló Iar-Chonnacht i bpáirt le OÉ Gaillimh agus déanfar na himeachtaí ar fad a reáchtáil mar sheimineár gréasáin, ar a mbeidh freastal fíorúil amháin, de bharr na srianta reatha atá i bhfeidhm maidir le Covid-19.

Tá slí ann do chéad duine ag an seimineár gréasáin agus moltar áit a chur in áirithe gan mhoill.

Beidh deis ag léitheoirí na Gaeilge, in Éirinn agus thar lear, freastal ar an seimineár ach clárú roimh ré ag an nasc seo: https://tinyurl.com/GearrscealtaMhairtinUiChadhain

Tá aird idirnáisiúnta nach beag ar an mórshaothar Cré na Cille (1949) ó chuir Cló Ollscoile Yale  leaganacha Béarla ar fáil den úrscéal: The Dirty Dust (2015), aistrithe ag Alan Titley, agus Graveyard Clay (2016), aistrithe ag Liam Mac Con Iomaire agus Tim Robinson. Is féidir Cré na Cille a léamh sna teangacha seo a leanas anois: Ioruais, Danmhairgis, Béarla, Dúitsis/Ollainnis, Gearmáinis, Seicis, Iodáilis, Cróitis, Ungáiris, Tuircis agus Tamailis.

Tá fáil anois ar The Dregs of the Day (Yale University Press, 2019), leagan Béarla a rinne an scríbhneoir agus an scoláire Alan Titley den nóibhille Fuíoll Fuine agus a foilsíodh den chéad uair sa chnuasach gearrscéalta An tSraith dhá Tógáil (Sáirséal agus Dill, 1970).

Dúirt an tOllamh Louis de Paor, OÉ Gaillimh:

‘Tá oidhreacht shaibhir liteartha ag an gCadhnach agus tá scagadh domhain agus ábhar plé i gcónaí sa chorpas gearrscéalta ach go háirithe. Is sna gearrscéalta is léire a fheictear mearbhall na nua-aoise agus coimhlint an duine leis féin, le córais agus le smaointeachas den uile chineál. Is tábhachtaí anois ná riamh go leanfaí den taighde ar Mháirtín Ó Cadhain agus go bhféachfaí leis an léirmhíniú a dhéanamh sa chomhthéacs idirnáisiúnta.’

Dúirt an foilsitheoir agus scríbhneoir, Mícheál Ó Conghaile, CIC:

‘Tá teacht ar fhormhór mór shaothar Uí Chadhain i nGaeilge, a mhórshaothar Cré na Cille i mBéarla agus teangacha eile, agus de réir a chéile tá aistriúchán á dhéanamh ar fhicsean eile dá chuid. Oscailt súl atá ann do léitheoirí idirnáisiúnta an grinneas sa tabhairt faoi deara agus an léargas a thugtar ar chás an duine i dtéacsanna nach raibh rochtain acu cheana orthu. Tugann an spéis idirnáisiúnta seo orainn filleadh ar na buntéacsanna agus léamh nua úr a dhéanamh ar scoth na scéalaíochta.’

Tá teacht ar Máirtín Ó Cadhain: Rogha Scéalta (CIC, 2014), arna chur in eagar ag Louis de Paor, ar shuíomh Chló Iar-Chonnacht: https://www.cic.ie/books/published-books/mairtin-o-cadhain-rogha-scealta

 

CLÁR 

 

Gearrscéalta Uí Chadhain

Seimineár Idirnáisiúnta Ar Líne

18 Meán Fómhair 2020

 


Máirtín Ó Cadhain: Rogha Scéalta
Máirtín Ó Cadhain: Rogha Scéalta

Níl aon amhras ach gurbh é Máirtín Ó Cadhain mórscríbhneoir Gaeilge na linne seo. Mar scríbhneoir, mar mhúinteoir agus mar agóidí d’fhág sé a mharc go soiléir agus go dána ar an saol....

Praghas: €15.00 Ceannaigh ›
An tSraith ar Lár
An tSraith ar Lár

Sa mbliain 1967, ceithre bliana déag tar éis do Mháirtín Ó Cadhain Cois Caoláire a chur i gcló, a foilsíodh an cnuasach gearrscéalta An tSraith ar Lár. Bhí na ceithre bliana déag sin caite...

Praghas: €10.00 Ceannaigh ›