CIC Logo

Úrscéal nua do pháistí á sheoladh i Scoil Náisiúnta Mhic Dara, An Cheathrú Rua

New translation of Eoin Colfer novel to launch in Scoil Náisiúnta Mhic Dara Monday, 14th October, 2019

Beidh úrscéal nua do pháistí atá aistrithe go Gaeilge ag Máirín Ní Ghadhra agus foilsithe ag Cló Iar-Chonnacht, á sheoladh i mí Dheireadh Fómhair. Seolfar An Buachaill Is Measa Ar Domhan le Eoin Colfer ag ócáid i Scoil Mhic Dara, an Cheathrú Rua, Co. na Gaillimhe, ar an gCéadaoin, 23 Deireadh Fómhair ag 11.00 r.n. Beidh Máirín Ní Ghadhra, iriseoir le RTÉ Raidió na Gaeltachta, ag léamh ón leabhar ag an ócáid agus ag caint faoina taithí féin mar aistritheoir ar leabhair do pháistí.

"Tá cliú agus tóir ar leabhra Eoin Colfer ar fud an domhain; scéal barrúil spraíúil atá anseo. Is mór agam an deis a bheith agam cuidiú le gasúir sult agus spraoi a bhaint as na scéalta sin tré mheán na Gaeilge," a dúirt Ní Ghadhra faoin leabhar seo.

Craoltóir í Máirín Ní Ghadhra a bhfuil deich mbliana fichead caite aice ag obair le Raidió na Gaeltachta. Cuireann sí an clár An tSeachtain le Máirín Ní Ghadhra i láthair chuile dheireadh seachtaine ar an raidió. Cuireann sí an clár cúrsaí reatha teilifíse 7Lá i láthair ar TG4 chomh maith. Tá cónaí uirthi ar an gCeathrù Rua lena fear Séamus agus a mbeirt iníonacha,  Eimear agus Ailbhe. 

Leagan Gaeilge den leabhar The Legend of the Worst Boy in the World, scríofa ag Eoin Colfer agus maisithe ag Tony Ross, is ea An Buachaill Is Measa ar Domhan. Tá an Ghaeilge sa leabhar spraíúil agus taitneamhach le léamh agus tá an leabhar feiliúnach do léitheoirí idir 7 agus 9 mbliana d'aois.

Díríonn an scéal ar leaid óg, Máirtín, is níl uaidh ach cluas éisteachta a fháil óna mhuintir nuair a thagann sé abhaile ón scoil agus fonn clamhsáin air. Ach ní mórán ama a bhíonn ag a Mhamaí agus a Dhaidí dhó. An chúis leis easpa ama seo, dar le Máirtín, ná an ceathrar clamhsánach atá mar dheartháireacha aige. Cé a éistfidh lena chlamhsáin féin?

Is é An Buachaill Is Measa Ar Domhan an deichiú leabhar do pháistí atá aistrithe go Gaeilge ag Máirín Ní Ghadhra. D'aistrigh sí leabhair ó na sraitheanna An Cúigear Cróga agus An Seachtar Stuama le Enid Blyton, Scéalta Scéine le Andrew Fusek, agus Dónall Dána le Francesca Simon. Is í eagarthóir an leabhair Nollaig Ó Gadhra: Cuimhní Cairde i gcuimhne ar a hathair, an t-iriseoir aitheanta Nollaig Ó Gadhra.


An Buachaill is Measa ar Domhan
An Buachaill is Measa ar Domhan

Leagan Gaeilge den leabhar The Legend of the Worst Boy in the World, scríofa ag Eoin Colfer agus maisithe ag Tony Ross. Is í Máirín Ní Ghadhra, iriseoir le RTÉ Raidió na Gaeltachta, a chuir...

Praghas: €8.00 Ceannaigh ›
Taibhse An Dá Thaobh
Taibhse An Dá Thaobh

Ceithre scéal mistéire atá sa tsraith Scéalta Scéine agus iad feiliúnach do léitheoirí idir 8 agus 11 bliain d’aois. Leabhair ghairid scioptha atá iontu atá feiliúnach do dhaoine...

Praghas: €7.00 Ceannaigh ›